As matronas do HCV ante os últimos acontecementos relacionados coa orde de peche do paridoiro de Verín queremos dar a coñecer o seguinte:
- Manifestar a nosa máis enérxica repulsa a tal medida polo que supón para as mulleres e familias de Verín e a súa area, ao ter que desprazarse nun momento tan delicado e imprevisible lonxe dos seus domicilios e do seu entorno, tendo moi en conta como pode repercutir todo isto no desenvolvemento fisiolóxico do proceso do parto.
- O noso máis sincero apoio as/os profesionais que desenvolven as súas actividades en relación coa atención ao parto e que non se deixen ferir polas opinións que se verteron dubidando da súa calidade na atención; quen acompañamos ás mulleres nos seus partos sabemos que a calidade ten que ver con números que midan dita calidade, non coa cantidade, e as mulleres e familias tamén o saben. Nos, tamén matronas de un comarcal, sentímonos especialmente ofendidas polas afirmacións vertidas respecto a perda de habilidades e desaprobamos ese discurso insostible e mal argumentado.
- Os argumentos utilizados para o peche do paridoiro e supresión de atención pediátrica as 24 horas baseados no descrédito de profesionais e en amedrentar ás mulleres e familias son do mais rastreiro que se lles puído ocorrer, deberían ter sido mais coherentes co seu discurso. Preguntámoslle a tales dirixentes, que ostentan cargos políticos e ou directivos durante anos, chegado o momento da súa volta ao traballo, alegarán vostedes o mesmo que nesta situación?, derivarán a xente a outros profesionais argumentando a súa falta de pericia tras anos de inactividade relacionada coas habilidades na súa profesión?. Parécenos moi perigoso o seu discurso ao respecto porque se podería trasladar a quen volta dunha baixa, dunha excedencia, etc.
- Dicímoslle aos responsables de tal medida, aos que se lle enche a boca coa verba “calidade”, que a calidade, non a tiveron en conta a hora de ditar o peche e ignorar totalmente as recomendacións vixentes na atención ao parto. Son vostedes uns descoñecedores do proceso de parto ao afirmar que é algo previsible, que tarda unhas horas e da tempo ao desprazamento. ¡Como se nota que vostedes falan dende os despachos!. Nós, os profesionais, con moitos anos de experiencia, seguimos sen ter a bola de cristal para prever cando se vai iniciar o proceso do parto.
- A incógnita e o imprevisíbel de cando se pon en marcha e se desenvolve o proceso do parto fan que moitas das mulleres estean nas últimas semanas ou días previos a el, angustiadas pola incerteza de se chegarán a tempo de ser atendidas. Como se van sentir estas mulleres agora?. Como se vai incrementar a súa angustia e como vai repercutir no proceso?. Cantas acudirán antes de tempo propiciando ingresos non necesarios ou volta aos seus domicilios?. A cantas non lle dará tempo a chegar?. Que pasará nos casos de emerxencias obstétricas nas que a atención temperá é clave para o estado da nai e da criatura?. Por certo, nestes días continuamente escoitamos falar de 70 km de distancia, isto, pode dar a impresión de que é un paseo; pois en moitos casos son mais km, e pola orografía e malas condicións das vías pódese converter o desprazamento na maioría das situacións en 1h 30 min. Sómente quen estamos ao pé desta atención podemos falar da repercusión que pode ter a falta de atención inmediata en determinadas situacións.
- Durante os últimos días, son moitas as manifestacións de profesionais argumentando o impropio do peche de servizos con datos sobre os bos resultados na atención no Hospital de Verín; a nós, non nos cabe a máis mínima dúbida sobre eses bos resultados. Amais, nós referéndamos e apoiamos especialmente as manifestacións de Sergio González Palanca, Xefe de Sección de Obstetricia e Xinecoloxía do HCV, no que se refire aos datos no noso comarcal; estes veñen a demostrar a boa práctica e óptimos resultados sendo tamén un hospital comarcal.
- Ás mulleres que acoden ao noso servizo dirémoslles que sigan confiando nos profesionais que as atendemos como sempre o fixemos, farémoslles saber que continuamente seguimos actualizándonos e responsabilizándonos da atención que prestamos, como demostran os nosos datos, e que se algunha dúbida teñen que nola dean a coñecer para poder aclarala.
- Felicitar a tódalas persoas da area de Monterrei polo seu tesón na loita sempre cívica por defender servizos tan básicos para manter a saúde das mulleres e de nenos e nenas.
- Para rematar, pedímoslles ós responsables de tal desfeita que dean un paso atrás na súa decisión, que reabran os servizos, que sempre será unha medida recoñecida pola poboación e polos profesionais; téñano presente.
Ningún comentario:
Publicar un comentario