O instrutor non considera probado máis de tres anos e medio despois de iniciarse o caso que “o falecemento dos doentes lles sexa imputable causalmente aos investigados
O xuíz instrutor da investigación penal polas mortes de varios doentes de hepatite C polas que a Fiscalía acusou a varios cargos da Xunta de homicidio por “razóns orzamentarias” vén de arquivar o caso máis de tres anos e medio despois por considerar que non hai indicios de que fosen responsables dos falecementos. O maxistrado Andrés Lago Louro así o decidiu nun auto con data deste luns que pode ser recorrido e que chega máis de tres anos e medio despois da denuncia da Fiscalía.
A decisión do xuíz supón o sobresemento provisional da causa e arquivo das actuacións respecto ao director de Asistencia Sanitaria e á subdirectora de Farmacia do Sergas, que foron investigados como presuntos responsables de delitos de homicidio por imprudencia grave profesional e prevaricación por, presuntamente, non facilitar o tratamento de pacientes de hepatite C.
O xuíz destaca que os medicamentos “se atopaban aínda en fase case experimental" e xustifica que o Sergas deseñas procedementos para a súa aplicación
“Non podemos afirmar que a morte ou falecemento dos pacientes lles sexa imputable causalmente aos investigados”, indica o maxistrado, quen subliña que “o falecemento sobreveu por causas alleas á demora, omisión ou dilación na tramitación das peticións ou solicitudes de aplicación dos novos fármacos”. O xuíz destaca que os medicamentos “se atopaban aínda en fase case experimental e cuns resultados que aínda eran incertos, de aí a necesidade de que as autoridades sanitarias deseñasen mecanismos ou procedementos destinados a precisar con sumo coidado aqueles casos en que estaría indicada a súa aplicación”.
O auto sinala que tampouco se pode concluír que, se se lles aplicasen aos pacientes os novos fármacos, se evitaría o seu falecemento. “Se analizamos o exhaustivo informe que foi emitido polo Instituto de Medicina Legal de Galicia (Imelga), a conclusión que se extrae é que o falecemento dos pacientes se produciu por causas alleas á subministración dos novos fármacos”, di o xuíz, quen engade que do informe forense infírese que os novos tratamentos antivirais “o que conseguían era unha eficacia moi alta á hora de eliminar o virus da hepatite C, pero iso non quere dicir que os pacientes curasen”.
O xuíz di que o procedemento deseñado polo Sergas para administrar os fármacos é “moi similar ao aplicado noutras comunidades autónomas”
O procedemento deseñado polo Sergas para garantir o acceso dos pacientes aos novos medicamentos da hepatite C, segundo o auto, é “moi similar ao aplicado noutras comunidades autónomas”. O maxistrado sinala que na data dos feitos os novos tratamentos “nin sequera se atopaban plenamente admitidos pola Axencia Europea do Medicamento, de modo que o seu acceso só podería facerse de modo extraordinario como uso compasivo para aqueles pacientes nunha situación de especial gravidade”. Ademais, indica que as autoridades sanitarias debían “cinguirse ás esixencias do titular da patente, neste caso Gilead, único laboratorio que os fabricaba”.
A plataforma de afectados amosa o seu «desacordo» e recorrerá o arquivo da causa
Intervención de afectadas pola hepatite no pleno do Concello de Vigo Dominio Público Plataforma Galega de Afectados pola Hepatite CA Plataforma de Afectados pola Hepatite C de Galicia anunciou xa que recorrerá o auto de arquivo ditado polo xuíz da causa contra os cargos da Xunta acusados de homicido por atrasar fármacos. A entidade, ademais, manifesta o seu "desacordo" coa decisión do maxistrado, que consideran que expón unhas razóns "que non se corresponden co que se foi evidenciando no transcurso do procedemento aberto no xulgado".
A plataforma di que o coñecemento de determinados feitos e documentos durante o proceso xudicial reafírmaos na súa opinión de que "as cousas non se fixeron como deberan". Así o explica o portavoz da entidade, Quique Costas, que advirte de que o auto "baséase exclusivamente nalgunhas testemuñas e informes e non ten en conta outros que resultan abertamente cuestionadores de como se actuou desde o Sergas".
A plataforma cre que o arquivo baséase "exclusivamente nalgunhas testemuñas e informes" e non ten en conta outros que "cuestionan a actuación do Sergas"
“O auto cita testemuñas e informes xenéricos emitidos por persoas e organismos que non están especializados na materia, mentres se desprezan as declaracións prestadas por médicos especialistas e responsables de farmacia que estiveron directamente implicados nos tratamentos dos pacientes que figuraban na denuncia”, engade Costas.
A plataforma adheriuse á denuncia presentada pola Fiscalía en novembro de 2018 e considera que os feitos que figuraban nela "non foron no substancial desacreditados nas dilixencias", polo que teñen decidido presentar recurso ao arquivo da causa.
Pola súa banda, o xerete do Sergas, Antonio Fernández-Campa, asegurou que o organismo sanitario está "satisfeito" logo do arquivo provisional da causa porque "confirma que a actuación", tanto do propio Sergas como dos profesionais investigados, "foi a correcta".
Ningún comentario:
Publicar un comentario