O PP galego sorprende cunha iniciativa que axilice a demanda contra os Franco por Meirás e acabe coa "ofensa"

Todo o grupo 'popular', incluído o presidente Feijóo, asina a proposta que quere acabar cunha "ofensa" aos galegos.

E.P.

http://www.galiciaconfidencial.com/

O Grupo Parlamentario Popular rexistrou unha iniciativa urxente na Cámara galega para reclamar que o Estado inicie as accións legais pertinentes co fin de poder incorporar ao patrimonio público o Pazo de Meirás, en posesión dos herdeiros de Francisco Franco.

Pazo de Meirás | Fonte: Europa Press

Así, os populares galegos fixeron súas as conclusións da comisión de expertos nomeada, a instancias do Parlamento, por parte da Consellería de Cultura e que foi presentado o pasado luns. O documento recolle como posibilidade que a Administración do Estado realice unha acción reivindicatoria, presentando unha demanda civil, na que argumente que se trata dun ben demanial, isto é, que pola forza do uso —institucional— se trata dun edificio público.

A iniciativa rexistrouse de forma urxente co propósito de que se poida debater na próxima sesión plenaria, tendo en conta que o mes de xullo é hábil no Parlamento galego. Na proposta, ínstase á Xunta a "remitir urxentemente á Administración Xeral do Estado o informe elaborado pola comisión de expertos", de forma que se realicen as accións legais que recomenda o documento para que este ben pase ao dominio público.

A proposición non de lei está asinada polos 41 deputados do Grupo Popular, incluído o presidente da Xunta, Alberto Núñez Feijóo, e nela lémbrase que a comisión de expertos conclúe, por unanimidade, que "é posible defender o dereito a adquisición por usucapión da condición de ben de dominio público" das tamén coñecidas como Torres de Meirás.

No que se presentou un voto particular, por parte do Concello de Sada, é na parte referida á conclusión cuarta, na que se recolle que unha vez que haxa sentenza firme do Tribunal Supremo, a liquidación da posesión, é dicir, o paso de titularidade ao Estado, podería implicar unha indemnización por gastos —debidamente acreditados— de mantemento aos actuais posuidores.

OUTRA PROPOSTA

Os populares tamén lembran na súa iniciativa que o pleno aprobou o 26 de setembro de 2017 unha proposición non de lei na que se instaba á Xunta a "realizar un estudo xurídico en colaboración coas universidades galegas, para analizar os mecanismos que, respectando a legalidade vixente, permitisen incorporar ao patrimonio público a propiedade das Torres de Meirás". Sobre esta iniciativa creouse esta comisión de expertos.

O PP considera que o grupo creado foi "amplo, plural e cualificado en materias xurídicas e históricas". Estivo presidido polo profesor de Historia Contemporánea Xosé Manoel Núñez Seixas e contou con profesores do tres universidades galegas, os colexios de rexistradores da propiedade, a asesoría da Xunta e a Dirección Xeral de Patrimonio Cultural, a Deputación da Coruña e o Concello de Sada.

O Grupo Popular xustificaba na iniciativa de setembro que os traballos de investigación histórica "demostraron documentalmente" a "falsidade" da versión dada polas autoridades franquistasdurante a Guerra Civil e os posteriores 40 anos" de que o Pazo de Meirás fora unha "ofrenda-doazón" realizada de forma voluntaria polos galegos ao ditador.

O PPdeG tamén se facía eco da "preocupación social" polo uso que lle viñan dando ao pazo os herdeiros, inclusive "incumprir" as obrigas cun inmoble declarado Ben de interese cultural (BIC) en 2011, así como os "anuncios de que pretendían facer con esta propiedade un espazo para mostrar ao gran público a grandeza da figura de Francisco Franco".

Finalmente, os populares entenden que os feitos historicamente comprobados e as declaracións dos actuais posuidores do pazo, que o puxeron á venda, e dos membros da Fundación Francisco Franco "constitúen unha innecesaria ofensa ás vítimas da ditadura, aos seus familiares e ao conxunto da sociedade galega".

"Unha sociedade que, de forma moi maioritaria, considera que o vixente período democrático constitúe unha feliz e pactada superación dunha etapa da nosa historia que nunca máis se debería repetir: a guerra civil e a subseguinte longa e opresiva ditadura", recolle a iniciativa.