Fume nos ollos

por abc

Collinlle un pouco de teima a iso do 'Estado do Benestar' cando comezou a usalo o PP para destruílo. Hoxe, botándolle unha ollada ós escombros, decátome que destruído foi o Estado de Xustiza Social. Un Estado que comezaba  a garantir a igualdade en materias básicas como a educación, a sanidade ou dependencia. Tiñamos conseguido incluso rachar ós mandamentos ditatoriais da igrexa de mans das mulleres, na nada doada decisión de ter ou non fillos, o matrimonio homosexual abría a posibilidade de equiparar dereitos a sentimentos sen cá orientación sexual fora inconveniente.

Nestes escombros algo cheira a podremia. Os grandes partidos, PP, PSOE e CiU embulleirados na corrupción máis rampante. Institucionalizados en feitos e costumes de saqueo ó erario público, parasitos con soldos e comisións inaceptables que ocupan cargos "a dedo" sen ter demostrado mérito nin cualificación algunha e sen máis función que aplaudirse uns a outros nos actos diarios (perfectamente inútiles) organizados por partidos e empresarios. Un chouriceo que consiste en que uns poucos, unha casta, manexan recursos alleos e toman decisións cuxas consecuencias non lles afectan, isto e o que fai a corrupción en política. Mentres dinnos que teñamos paciencia, que xa pronto chegará o fin da crises, a luz o final do túnel, España está secuestrada dámonos conta, sen asombro, cós mesmos que dan leccións de austeridade, viviron, durante anos, no despilfarro e na abundancia. Timáronnos, roubáronnos, estafáronnos e enganáronnos. E aínda teñen a pouca vergoña de mirar cara outro lado.

Casos como Bárcenas, Gürtel, Nóos, Palma-Arena, Fabra, Blesa e caso dos EREs, Mercurio, Pretoria e caso Palau, ITV, Crespo, Pallerols. Os nosos Pokemon, Baltar... O chalet de Ignacio Gonzalez… E agora ós dous grandes sindicatos e a patronal, encantados tamén coa mordida, con (entre outros) o fraude dos cursos formativos para traballadores. Desculpade se esquezo algún. Sede benvidos á 'Cosa Nostra', o máis puro estilo 'El Padrino'. Con este panorama, e coa Xefatura do Estado completamente desprestixiada (méritos sonlle propios) cun Poder Xudicial gobernado por "agradecidos" e unha Axencia Tributaria amordazada, os inquilinos das rúas Génova, Ferraz ou Córsega coñecen ben as regras do xogo… A impunidade é sempre a derradeira baza. O noso futuro e o dos nosos descendentes pinta incerto e preocupante…!

A nosa paciencia, é como un vaso de auga enchese, e enchese, e enchese, e o final, derramase. Sen decatarnos cál é a gota definitiva que nos fará saír á rúa, masivamente, e dicir "xa esta dabondo". Pode que tarde pero de seguro, este momento chegara. Cada pinga enche día a día o vaso de indignación e xa estamos fartos.

A corrupción non ten pertenza, e seu poder, engulípanos a todos. A resignación, vaise esgotando a fungueirazos de sobres, papeis, comisións, sobresoldos. Mentres nós quedamos no paro, non chegamos a fin de mes, non podemos pagar a hipoteca, desafiúzannos, non temos para calefacción nin qué comer… asistimos a un novo acto desta traxedia que chaman CRISES. Os papeis de Bárcenas, ou o último capítulo da entrada en prisión do banqueiro Miguel Blesa, logo de 15 macilentos días entre rellas xa volve estar na rúa… e o xuíz Elpidio Silva, por metelo no cárcere, agora pídenlle 40 anos de inhabilitación, é dicir, a expulsión da carreira xudicial, por prevaricación e delito contra a liberdade individual, lembrades o xuíz Garzón..? Poucas sorpresas nos deparan no seu desenlace. Os guionistas vannos habituando a moito ruído e poucas noces e logo se te vin non me lembro. Oxalá nos sorprenderan agora no final de acto. En todo caso, dependerá de nós. Ocupala función, cambiar o guión, e chegar a dicir: "deica logo Mariano".

Derrubase e privatizase o público: a sanidade, a educación, a xustiza e agora tamén a seguridade. E para agochar todo precisase dun espantallo, un artificio de dimensións aló menos semellantes ó colosal delito que cometen. Que sorte temos co tema do catalán da independencia. É perfecto. Provoca paixóns, debates asañados e simplistas, gaña adhesións ós partidos da dereita amais é manexable coma un monicreque. Pasarán o segundo plano recortes en dereitos e roubos. Mentres vannos desplumando e apropiándose do que a todos pertence. Resumo: o que veremos todo o ano próximo será o centralismo do tema nacional a costa do tema social. Quen ouse rebelarse, pagarao caro.

Agárdanos, pois, todo un ano no que toda a atención mediática centrarase nun tema, esquecendo o tema central, tanto en Catalunya como no resto do Estado, que é, o deterioro do Estado de Xustiza Social (benestar social) e a calidade de vida da poboación española e catalá. Do que se beneficiarán enormemente ás dereitas españolistas e cataláns, cuxa alianza en temas económicos e laborais é a responsable de dito deterioro, utilizando sentimentos nacionalistas en favor das súas posturas, a fin de ocultar a tráxica realidade social na que vivimos nas dúas veiras do Ebro.

Ninguén esta contento coa situación actual, todos nos independizaríamos desta chusma chamada políticos (eu non digo que todos sexan iguais, pero os que mais poder teñen hoxe, si son os máis corruptos que coñezo). De feito, a maioría da poboación española tamén rexeitamos ó Estado español de acordo ó slogan do 15-M "non nos representan".

Incapaces de facer, innovar, resolver, o goberno español, que por xenética ten experiencia en asuntos de represión, está dando os pasos necesarios para pasar dunha democracia a un réxime autoritario, antesala doutra ditadura coa que soñan. Sucede cando se é tolerante con quen por educación ou conviccións é esencialmente intolerante. Xa pasou outras veces ó longo da historia, pero seguemos "erre que erre".

Cando non houbo chourizos na Política?. Pode que sempre, aínda así a Política e os políticos son necesarios porque sen eles non só non deixaría de haber chourizos, senón que non saberiamos que existen e por riba non poderíamos cambialos por outros. Eses, os que gobernan? Como é posible que nos deixemos gobernar por tales xestores? Cál pode ser a imaxe de España con estes gobernantes? Os que votastes a este PP (partido político) saberedes que sodes cómplices. Con que bemoles podedes  aturalos? Qué máis vos ten que facer un goberno para inhabilitalo de por vida? Este Caos só é un enfermizo estado das cousas que arrampla con todo e hipotécanos a nós e as futuras xeracións.

Vostede dirá, porque vostede ten moito que dicir, si vostede vota, é quén di o que haxa que dicir, o que vostede pensa. O principal deste asunto, é o fume nos ollos, que nos queren meter, para que non vexamos os verdadeiros problemas, uns problemas que son unha sociedade corrupta e egoísta fundamentalmente.