O Estado español suspende en educación sexual

Susana Hidalgo

Pílulas anticonceptivas

O 70% das mulleres españolas en idade reprodutiva utilizan métodos anticonceptivos, pero para o Goberno os dereitos sexuais carecen de importancia e, coa escusa da crise económica, paralizou as estratexias de saúde neste ámbito.Esta é a denuncia que fai a Federación de Planificación Federal Estatal (FPFE) baseándose nos resultados do Barómetro do acceso das mulleres á libre elección de anticonceptivos modernos en 10 países da UE, que foi presentado ante o Parlamento Europeo o pasado xuño. Este barómetro avalía as políticas sobre dereitos sexuais e reprodutivos, a educación sobre eles e sobre os distintos tipos de anticonceptivos, a formación dos profesionais da saúde ou as campañas de sensibilización. O barómetro recolle datos de Alemaña, Bulgaria, España, Francia, Italia, Lituania, Países Baixos, Polonia, República Checa e Suecia.

"Suspendemos en case todo, especialmente en educación sexual", critica Luís Enrique Sánchez Acero,presidente da FPFE. O barómetro reflicte como a paralización da estratexia de saúde sexual e reprodutiva traduciuse nun retroceso no acceso aos servizos a métodos anticonceptivos seguros e eficaces, en dificultades para entrar nos servizos de planificación ou na formación de profesionais.

Nin sensibilización nin axudas

Así, o Estado español suspende en sensibilización cun 25% (só queda por encima de República Checa, Italia e Lituania), en educación sexual cun 25, 6% (só supera a Bulgaria, República Checa e Lituania) e aproba raspado en educación e formación de profesionais cun 57, 9%. Noutros ámbitos como o empoderamento das mulleres, queda nun raquítico 22%, por baixo de Lituania que obtén un 30%. A conclusión á que chega o barómetro é que "as actuais medidas de austeridade percíbense como o maior obstáculo para reducir os embarazos non planificados e para garantir o acceso das mulleres á libre elección de anticonceptivos modernos".

As máis afectadas son as mulleres máis novas e pertencentes a colectivos vulnerables e as maiores odiseas prodúcense ao tentar conseguir a pílula postcoital

Ademais, a FPFE advirte das "evidentes desigualdades que existen na prestación de servizos de saúde sexual e reprodutiva segundo as comunidades autónomas". As máis afectadas son as mulleres máis novas e pertencentes a colectivos vulnerables e as maiores odiseas prodúcense ao tentar conseguir a pílula postcoital, que non está financiada en seis comunidades autónomas. Nesta liña, o barómetro considera deficientes as campañas de promoción sobre dereitos sexuais e reprodutivos, salvo por puntuais accións dalgunhas comunidades autónomas, ou a educación en saúde sexual, coa desigual implantación segundo o lugar. A lei de Saúde Sexual e Reprodutiva de 2010 prevé a inclusión da educación sexual nos currículos escolares, pero  "isto quedou en vía morta, e de feito os cambios previstos na nova lei de educación reducen esta temática", denuncia o presidente da FPFE.

A todo isto hai que sumar o feito de que, desde o pasado 1 de agosto, un total de oito pílulas anticonceptivas deixaron de ser financiadas polo Sistema Nacional de Saúde (SNS) afectando en total a un millón de mulleres. "Ademais, as usuarias veñen denunciando a menor dispoñibilidade de anticonceptivos de barreira, de novos  contraceptivos hormonais ou da anticoncepción de urxencia", denuncian desde a FPFE. "Nesta situación de crise para tantas persoas, se non hai financiamento e garantías de dispensación córrese o risco dun aumento das taxas de embarazo non planificado e por tanto de interrupcións voluntarias do embarazo", conclúe o seu presidente.